Útsala á auðlindunum

Útsala á auðlindunum Í gær, 7. 10. 2010 var áhugarverður fundur í Háskólatorginu um skýrslu nefndar um orku- og auðlindarmál. Var þar talað um sölu HS orku til Magma Energy. Nú hefur maður lesið í fréttunum undanfarið að nefndin hefði komist að þeirri niðurstöðu að salan hefði verið lögleg! Hins vegar var farið á fundinum yfir lagaumhverfið í þessum málum og þar kom fram, að lögin eru mjög óskýr og hægt að túlka þau á mismunandi veg. Þannig að nefndin álitaði að með hliðsjón af þessu væri ekki hægt að fullyrða að salan hefði verið ólögleg. Fréttaflutningur var þannig ekki í samræmi við álit nefndarinnar.Mér finnst að það þurfi að taka verulega til í lögunum okkar þannig að ekki sé hægt að menn finni smugur að sniðganga þau. Þetta virðist frekar algengt hér á landi. Á fundinum var dregin upp samlíking af þessum vanda á spaugilegan hátt: Þegar ég fer í sund þá stendur á búningsklefanum: „Aðeins fyrir konur“, en ef ég athuga nánar þá les ég smáletrað þar fyrir neðan: „En karlmenn mega nota klefann líka“. Kannski verður þar einnig minnst á að karlmenn mættu einungis koma inn á sunnudögum og verða að vera í rauðum sundskýlum. Spinna má þetta lengra en svona virðist lögin okkar vera: Oftast er hægt að finna krók og kima til að fara í kringum þau. Enda er hugtakið „löglegt en siðlaust“ frekar oft notað.Mjög sláandi voru upplýsingar frá Stefáni Arnórssyni jarðfræðingi um það hvort jarðhitinn sé endurnýjanleg auðlind. Varmanáma sem er upphituð af heitu bergi er það nefnilega ekki og getur klárast á uþb. 50 árum. Auk þess myndi hún ekki ná sér aftur eftir að hún væri tæmd. Þannig að það ber að fara með gát í að bora óhindrað eftir jarðvarma án ýtarlegra rannsókna og hlusta verður á álit og ráðgjöf sérfræðinga.Snúum okkur að Magma- málinu og útsölunni á orkulindunum okkar. Yfirgnæfandi meirihluti í þjóðfélaginu er sammála um að auðlindirnar eigi að vera í eigu þjóðarinnar. Að vera þjóðareign þýðir að mínu mati að ríkið á þær og þær séu nýttar á skynsamlegan hátt svo að þær klárist ekki. Þess vegna finnst mér að lögin eigi að vera mjög skýr  um að ekki megi einkavæða auðlindanotkun, og þá skiptir ekki svo miklu máli hvort þær séu seldar til Íslendinga eða einhvers skúffufyrirtækis út í heimi. Íslenskir braskarar hafa jú oft farið ránshendi um eignir þjóðarinnar undanfarin ár.