Vorið er ljótt

Þegar snjórinn hverfur blasir við allur sóðaskapur: Fullt af rusli sem hefur fokið úr illa lokuðum ruslapokum eða ónýtum ruslílátum, ekki minnst á allt þetta sem menn henda frá sér þar sem þeir standa og ganga. Ennþá liggja á víð og dreif leifar eftir áramótabrjálæði og margir hafa ekki séð sér sóma í því að hirða gamlar "tertur" sem þeir skutu upp á loft.

Alltaf finnst mér mars og apríl vera ljótir mánuðir út af þessu þrátt fyrir alla tilhlökkunina um vor með blóm í haga.  Erum við virkilega svona skeytingalaus um okkar nánasta umhverfi að okkur er alveg sama um sóðaskapinn allt í kringum okkur? Kannski þarf bara að sekta fólk sem henda rusl á almannafæri. Kannski dugar ekkert nema að taka sóðana á buddunni.

Athugasemdir

[Hörður Halldórsson, 28.3.2012 kl. 19:27]

Mikið af þessu rakettu rusli er enn hér og þar og verður fram á vor .

[Hjóla-Hrönn, 28.3.2012 kl. 19:41]

Ég keypti kassa af Björgunarsveitunum og skaut því upp. Gekk síðan um svæðið og hirti dótið upp aftur, sérstaklega var ég að leita að því sem sprakk ekki, svo börn færu sér ekki að voða með fikti.

Þetta tók mig 5 mínútur og fór aftur ofan í sama kassann. Geymdi hann úti við til öryggis um nóttina, svo fór þetta í ruslið. Fólk virðist vera svo lítið úti við, að það sér ekki ruslið eða er bara skítsama. Ég sé enn fólk kasta rusli út um gluggana á bílnum sínum. Bæði sígarettum, ísboxum og öðru rusli. Ótrúlegt að svona sóðaskapur skuli viðgangast.

Og sandurinn á göngustígum finnst mér eiginlega mesti sóðaskapurinn og fer gífurlega í taugarnar á mér. Þetta berst inn í hús og jafnvel alla leið upp í rúm. Oh, segi það með þér, ég er farin að þrá vorið með allri sinni fegurð.