Frá Ísafirði

Það var gaman að koma til Ísafjarðar sl. helgi. Þar átti sér stað stærsta og fjölmennasta trimm- mót á Íslandi: Íslandsmótið öldunga í blaki. Frá 30 ára og upp úr allan aldursskala var spilað blak í 3 daga á Ísafirði, Bolungarvík, Suðureyri og Flateyri. "Skellurnar" sem skipulögðu þetta stóra mót eiga hrós skilið fyrir alveg frábæra daga sem blakfólkið fékk að upplifa. Þetta tókst vel í alla staði og lokahófið var sérlega glæsilegt. Skemmtilegt var einnig að sjá kvennalandsliðið spila leik á móti norska liðinu frá Tromsö. Flott innlegg þetta.

Blak - íþróttin er frábær íþrótt sem er hægt að stunda fram eftir öllum aldri. Með tilkomu "Krakkablaksins" geta börn frá 6 ára aldri lært skref fyrir skref að ná tökum á tækninni sem maður þarf að kunna í blaki.

Þessi íþrótt fær því miður allt of litla umfjöllun í fjölmiðlunum. Einasta frétt sem ég sá í dag í blöðunum var frá því að ein kona fékk hjartastopp í keppninni og tókst að bjarga henni með réttum viðbrögðum. Þarf eiginlega alltaf eitthvað svoleiðis að gerast til þess að komast í blöðin? Er það ekki líka fréttnæmt efni að meira en 500 manns hittast á stað úti á landi að keppa og skemmta sér konunglega? Að litið félag getur skipulagt jafn stórt mót með slíkum glæsibragð eins og hér var raunin?