Lakagígar

Ásamt nokkrum vinum og vandamönnum gerði ég mér ferð í Lakagígar. Við fórum frá Kirkjubæjarklaustri með áætlunarbílnum þangað. Auðvitað voru bara útlendingar í bílnum, Íslendingar ferðast ekki þannig. Ég veit satt að segja ekki hvers vegna. Þetta var ósköp þægileg ferð, maður þurfti ekki að hafa áhyggjur af neinu og gat bara notið þess að vera á ferðalagi. Ferðin var vel skipulögð og Kynnisferðir eiga lof skilið eins og bílstjórinn sem ók af einstakri snilld.

Mikið ósköp er Lakasvæðið áhugavert. Þangað langa mig að fara með tjald og vera í nokkra daga og ganga og skoða. Gleðilegt er að sjá að landvörður er þarna í eftirlitsferðum, að gönguleiðir hafa verið stikaðar. Umgengni er nokkuð gott þarna og flestir virða átta sig á því að þetta svæði er gersemi sem þarf að meðhöndla með virðingu. Flott væri að fá fleiri klósett á staðinn. Bara eitt lítið "toblerone - hús" nægir varla fyrir rútufarþegar sem eru búnir að halda í sig nokkuð lengi.

Athugasemdir

[Magnús Bergsson, 15.7.2008 kl. 03:42]

Ég átti leið um Lakagígasvæðið á reiðhjóli í fyrra. Dvaldi á svæðinu í þrjá daga og komst að því að þarna var furðu lítil umferð miðað við hvað það var áhugavert. En líklega var það svona áhugavert þar sem það var ekki útjaskað af átroðningi eins og svo margir aðrir staðir á landinu. Kári landvörður er reyndar býsna góður að standa sína plikt. Ég geri þó ráð fyrir að innan 10 ára mun svæðið verða útjaskað af átroðningi. Það á nefnilega að tengja hina hefðbundnu Lakagígaleið yfir Baugaháls svo þá myndast hringtenging. Þá mun svæðið fá yfir sig mikið magn af gegnumkeyrslu og um leið aukin átroðning. Vegna þess hvað mosinn er viðkvæmur geri ég ráð fyrir hinu versta.

En talandi um klósett. Í fyrra var verið að reisa klósettbyggingu sunnan við Lambavatn við Lakagíga. Það var nú meira en bara litið "Toblerone - hús" ("A" hús, stundum kallað "Völundarhús") Rútubílstjórinn hefur líklega ekki stoppað á réttum stað.

[Úrsúla Jünemann, 17.7.2008 kl. 06:56]

Jú, bílstjórinn stoppaði einnig hjá fínu klósettunum í seinna stoppinu, en ekki allir rata þangað.

Ég er sammála þér að þetta svæði er í mikilli hættu enda sérlega viðkvæmt fyrir átroðning. Þess vegna er mjög áriðandi að merktir stígar eru til og gott eftirlit með umferðinni þarna.