Heimsmet í plastpokum

Í hvert skipti sem ég fer að versla ofbýður mér ofnotkun plastpoka. Ennþá er horft á manninn eins og furðudýr þegar maður vill ekki plastpoka við kassann, þegar maður tekur upp bakpoka eða taupoka í staðinn og lætur það duga.

Plastið eyðist ekki eða allavega hægt í náttúru, það safnast til dæmis fyrir á ýmsum stöðum í sjónum og veldur þar mikið rask í vistkerfum. Sorp í plastpokum brotnar hægt niður, miklu hægar en ef það væri ekki pakkað í þessa "snyrtilega" húð. Ennþá er hér á landi venja að troða allt í svarta ruslapoka sem fellur til þegar garðar og grasflötin eru snyrt. Hefur einhverjum verkstjórum dottið í hug að koma með kerru og moka garðafgangar beint á kerrunna og keyra í moltugerð?

Plastið er gott til sins brúks en margt er hægt að gera án plastpoka.

Athugasemdir

[Hjóla-Hrönn, 15.7.2011 kl. 12:36]

Heyr, heyr.  Við erum ennþá rosalega aftarlega á merinni þegar kemur að förgun sorps.  Ég nota innkaupapokana sem ruslapoka, einfaldlega af því þeir sem maður kaupir á rúllu eru dýrari.  Og náttúrulega líka úr plasti, þó að það sé þynnra.

Ég hef alltaf grafið holu í garðinn hjá mér og allur garðaúrgangur fer þar ofan í, svo breytist það í moltu og maður getur notað það sem áburð í blómabeðin eftir 2-3 ár.  Ef það fellur of mikið til, þá já, nota ég svarta ruslapoka til að fara með það í sorpu, en losa þar úr pokanum og tek aftur með mér heim og endurnýti.

Oft er þetta bara hugsunarleysi hjá fólki, plastið er ódýrt og þess vegna ekkert verið að spara það.  En það má ekki gleyma umhverfisáhrifunum.